კეთილი იყოს თქვენი მობრძანება
საქართველო
საქართველო
თბილისი საქართველოს დედაქალაქი და ერთ-ერთი მუნიციპალიტეტია, რომელიც აღმოსავლეთ საქართველოში, თბილისის ქვაბულში მდებარეობს. ეს ქალაქი გამორჩეულია როგორც ბუნებით, ასევე მნიშვნელოვანი კულტურული ნიმუშებითა და ისტორიით. აქ ნახავთ ჩანჩქერებს, ტბებს და ძალიან ლამაზი ხედებითაც დატკბებით. თბილისისთვის სახასიათო ნიშაა ეკლექტიკა. აქ მრავალი სხვადსხვა ეპოქისა თუ ხასიათის კულტურა იყრის თავს და საინტერესოდ ერწყმის ერთმანეთს. ასევე აღსანიშნავია, თავად დედაქალაქის გარდა, თბილისის მუნიციპალიტეტში შემავალი დასახლებები, სადაც განტვირთვისა და ხეტიალისთვის სასიამოვნო გარემოს, ისტორიულ-კულტურული ღირებულების ტაძრებსა და შთამბეჭდავ ციხე-სიმაგრეებს ვხვდებით.
სვანეთი საქართველოს ყველაზე მაღალმთიანი ისტორიულ-გეოგრაფიული მხარეა და იგი დასავლეთ საქართველოს ჩრდილოეთ ნაწილში მდებარეობს.
სვანეთი მკვეთრად გამოხატული ინდივიდუალიზმით გამოირჩევა. მწვერვალები, ქარაფები, ციხე-კოშკები, რომლებიც თავისუფლებისა და ძლიერი სულის სიმბოლო გამხდარა, დიდი ხანია მოგზაურების, დამსვენებლებისა თუ სამთო სპორტის მოყვარულების ყურადღებას იპყრობს.
ეს უძველესი კულტურის მქონე მხარე ძალიან საინტერესოა მრავალრიცხოვანი კულტურის ძეგლებით, სახასიათო ფრესკული ნიმუშებით, წეს-ჩვეულებებითა და მრავალფეროვანი, შთამბეჭდავი ბუნებით.
სამეგრელო დასავლეთ საქართველოს ისტორიულ-გეოგრაფიული მხარეა, რომელიც მდინარე რიონს, ცხენისწყალს, ენგურსა და შავ ზღვას შორის მოქცეულ ტერიტორიას მოიცავს
მისი ცენტრალური ქალაქია ზუგდიდი. სამეგრელოს რეგიონს მთელი თავისი ისტორიის მანძილზე უდიდესი სტრატეგიული მნიშვნელობა ენიჭებოდა, რის გამოც რომაელების, ბიზანტიელების, მონღოლების, თურქების, სპარსელების, რუსებისა და სხვათა არმიების არაერთი შემოსევის ობიექტი გახდა.
ეს მხარე მდიდარია სხვადასხვა ეპოქის კულტურის ძეგლებითა და შთამბეჭდავი ბუნებით, ცისკიდურთან, ჭინკების სამეფოში მოლივლივე ლურჯი ტბებითა თუ ულამაზესი კანიონებით.
კახეთი აღმოსავლეთ საქართველოში მდებარე მხარეა, რომელიც ისტორიულ–გეოგრაფიული პროვინციების კახეთის, ჰერეთის (ნაწილობრივ) და თუშეთის ტერიტორიებს მოიცავს.
ეს მხარე მდიდარია სხვადასხვა პერიოდის ძეგლებითა და მრავალფეროვანი ბუნებით.
აქ ნახავთ უძველეს ნამოსახლარებს, გამორჩეულ ტაძრებს, ციხე-კოშკებს, ულამაზეს ტყეებს, ჩანჩქერებს, ალპურ ტბებს, ვრცელ ველებსა და აფერადებულ უდაბნოსაც კი.
უძველესი ისტორია, საინტერესო კულტურა, შთამბეჭდავი ბუნება და კურორტები კახეთს ძალიან მიმზიდველს ხდის სასიამოვნო დასვენების მსურველთათვის და მოგზაურობის მოყვარულთათვის.
ლეჩხუმი დასავლეთ საქართველოს ჩრდილოეთ ნაწილში მდებარე მხარეა, დღევანდელი ცაგერის მუნიციპალიტეტი. იგი უძველესი კულტურითა და ულამაზესი ბუნებით გამოირჩევა.
ტყეებით, ჩაჩქერებით, კანიონებით, მინერალური წყლებით, ალპური მდელოებით, ტბებით და მისტიური, დიდი ისტორიის ხვამლის მთით ლეჩხუმი ძალიან საინტერესო და მიმზიდველია მოგზაურობის მოყვარულთათვის.
ხვამლის მთა მთელი საქართველოს ისტორიისთვის მნიშვნელოვანი ადგილია, რომელსაც უამრავი ადამიანი სტუმრობს ხვამლობის დღესასწაულზე.
აფხაზეთი არის საქართველოს უკიდურესი ჩრდილო-დასავლეთის ისტორიული პროვინცია.
ამჟამად მისი ჩრდილოეთ საზღვარი კავკასიონის მთავარი წყალგამყოფი ქედის თხემს გასდევს, სამხრეთით და სამხრეთ-დასავავლეთით შავი ზღვა აკრავს, ჩრდილო-დასავლეთის საზღვარი მდინარე ფსოუზე გადის, ხოლო აღმოსავლეთი სვანეთ - აფხაზეთის ქედზე და მდინარე ენგურზე.
აფხაზეთის ავტონომიური რესპუბლიკის ფართობი დღეს 8,7 ათასი კვ.კმ-ია, რაც საქართველოს ტერიტორიის 12,5 პროცენტს შეადგენს..
რაჭა საქართველოს ისტორიულ-გეოგრაფიული მხარეა, რომელიც დასავლეთ საქართველოს ჩრდილო-აღმოსავლეთ ნაწილში მდებარეობს. იგი ძალიან მდიდარია კულტურული ძეგლებითა და მრავალფეროვანი ბუნებით.
რაჭაში მდებარეობს უხვი და დახვეწილი ჩუქურთმებით სახელგანთქმული, ქართული ხუროთმოძღვრების შედევრი, ნიკორწმინდა.
საინტერესო კულტურის ნიმუშების გარდა ამ მხარეში დატკბებით გრილი ტყეებით, ალპური ტბებით, ულამაზესი ჩანჩქერებითა და მომნუსხველი ხედებით.
გურია დასავლეთ საქართველოში მდებარე მხარეა და ისტორიულ-გეოგრაფიული პროვინციის, გურიის ტერიტორიას მოიცავს.
გურიას უძველესი ისტორია და ულამაზესი, მწვანეში ჩაფლული ბუნება აქვს. გრილი ტყეებით, მინერალური წყლებით, ალპური მდელოებით, კულტურული ძეგლებითა თუ ქვიშიანი სანაპიროთი გურია სხვადასხვა გემოვნებისა და ინტერესების მქონე ადამიანისთვის გახლავთ მიმზიდველი.
აქ მცხუნვარე მზის ქვეშ მოელვარე ზღვის სანაპიროდან უცებ მთის სუსხში, ღრუბლებს მაღლა შეგიძლიათ აღმოჩნდეთ.
ქვემო ქართლი აღმოსავლეთ საქართველოში მდებარე მხარეა, რომელიც ისტორიულ-გეოგრაფიული პროვინციების ქვემო ქართლის და თრიალეთის ტერიტორიებს მოიცავს.
ეს მხარე უდიდეს წარსულს ინახავს პრეისტორიული ხანიდან დღემდე.
ქვემო ქართლში აღმოაჩინეს 1 800 000 წლის პირველი ევროპელებიც - ზეზვა და მზია.
აქ არის ძვ.წ. IV ათასწლეულის საყდრისის ოქროს მაღაროც.
ქვემო ქართლი მდიდარია სხვადასხვა პერიოდის ძალიან საინტერესო კულტურული ძეგლებითა და ულამაზესი, მრავალფეროვანი ბუნებით, ტყეებით, ტბებით, მინერალური და თერმული წყლებითა და კურორტებით.
სამცხე-ჯავახეთი სამხრეთ საქართველოში მდებარე რეგიონია და მოიცავს სამცხის, ჯავახეთის და თორის ისტორიულ-გეოგრაფიული პროვინციების ტერიტორიებს. მისი ადმინისტრაციული ცენტრია ახალციხე.
რეგიონს აქვს გამორჩეული გეოგრაფიული ადგილმდებარეობა, რაც ხელს უწყობდა საუკუნეების განმავლობაში მის ეკონომიკურ და კულტურულ ურთიერთობებს მოსაზღვრე სახელმწიფოებთან.
სამცხე-ჯავახეთი უდიდესი ისტორიულ-კულტურული მნიშვნელობის მხარეა და ბევრი ქრისტიანული თუ წინარექრისტიანული ძეგლი შემოგვინახა.
ის ასევე მდიდარია მრავალფეროვანი ბუნების ძეგლებით, წიაღისეულითა და კურორტებით.
შიდა ქართლი საქართველოს იტორიულ-გეოგრაფიული მხარეა, რომელიც აღმოსავლეთ საქართველოში, ისტორიული ქართლის ცენტრალურ ნაწილში მდებარეობს
შიდა ქართლის ძველი სახელი ზენა სოფელია. რეგიონი მდიდარია მნიშვნელოვანი კულტურის ძეგლებითა და ლამაზი ბუნებით. შიდა ქართლი უძველესი ისტორიის მქონე მხარეა, ეს ტერიტორია ჯერ კიდევ ადრეული ბრინჯაოს ხანიდან ყოფილა ინტენსიურად დასახლებული.
ძალიან შთამბეჭდავია ამ მხარის ათასფერი ყვავილებით აფერადებული, უსასრულობამდე გადაჭიმული ვრცელი მინდვრები, ხეობები და ჩანჩქერები.
მცხეთა-მთიანეთის მხარე აღმოსავლეთ საქართველოში მდებარეობს და მოიცავს შემდეგ ისტორიულ-გეოგრაფიულ პროვინციებს: ხევი, ერწო–თიანეთი, ფშავი, ხევსურეთი, მთიულეთი, გუდამაყარი და ნაწილობრივ ქსნისხევი.
მას ჩრდილოეთით ესაზღვრება რუსეთის ფედერაციის რესპუბლიკები: ჩრდილოეთ ოსეთი, ინგუშეთსი და ჩეჩნეთი, აღმოსავლეთით–კახეთის რეგიონი, სამხრეთით–ქვემო ქართლი, ხოლო დასავლეთით კი შიდა ქართლი.
მხარის ადმინისტრაციული ცენტრია მცხეთა. რეგიონის შემადგენლობაშია შემდეგი ადმინისტრაციული ერთეულები: ახალგორის მუნიციპალიტეტი, დუშეთის მუნიციპალიტეტი, თიანეთის მუნიციპალიტეტი, მცხეთის მუნიციპალიტეტი, ყაზბეგის მუნიციპალიტეტი.
მცხეთა-მთიანეთი უძველესი ისტორიის მქონე ძალიან მრავალფეროვანი მხარეა, მდიდარი კულტურული ძეგლებითა და ულამაზესი ბუნებით. მცხეთის ტერიტორია ჯერ კიდევ ადრინდელი ბრინჯაოს ხანაში იყო დასახლებული.
უძველესი კულტურის ნაშთები, ხევსურული ბანიანი სახლები, კოშკები, ტაძრები, ფარდაგები, ულამაზესი ორნამენტული სამოსი, მწვერვალები, კლდეები და ტბები წარუშლელ შთაბეჭდილებას ტოვებს მნახველზე.
რეგიონის ტერიტორიაზეა საგურამოს, ფშავ-ხევსურეთისა და ყაზბეგის სახელმწიფო ნაკრძალები.
მხარის მშვენებაა კავკასიონის მთავარი ქედი 3500 მ–ის და 5000 მ–ის მწვერვალებითა და უღელტეხილებით. მცხეთა-მთიანეთის მხარის დაბლობ ნაწილში ჰავა ზომიერად ნოტიოა.
იცის ზომიერად ცივი ზამთარი და ცხელი, ხანგრძლივი ზაფხული. საშუალო წლიური ტემპერატურა 11℃-ია, იანვარში კი 0℃-ზე დაბალია.
მთაში ნამდვილ ზაფხულს მოკლებული მაღალმთის ნოტიო ჰავაა, ხოლო 3300-3400მ-ის ზემოთ - მაღალმთის ჰავა ჭარბი თოვლითა და მყინვარებით.
მთელი წლის განმავლობაში რეგიონში არაერთი რელიგიური დღეობა და პოპულარული ფესტივალი იმართება.
მათ შორისაა: ლომისობა, კოპალობა, ლაშარობა, გერგეთობა და სხვ. გამორჩეული და მრავალფეროვანია მცხეთა-მთიანეთის სამზარეულოც.
ძალიან პოპულარულია: ფშავური ხინკალი, ჩობან ყაურმა დამბალხაჭო და სხვა. ეს მხარე მდიდარი ფოლკლორითაც აღსანიშნავია. ცეკვა, სიმღერა, ხალხური პოეზია, ლეგენდები, საუკუნოვანი კულტურული ძეგლები, საინტერესო ადათ-წესები და შთამბეჭდავი ბუნება ქმნის ამ მხარის უნიკალურობას.
